«Էլեկտրոնային առողջապահության ազգային օպերատոր»  ընկերությունն ու   Գերմանիայի առաջատար բժշկական կենտրոններից մեկի՝ Ֆրայբուրգի պետական բժշկական համալսարանի փորձառու մասնագետները կհամագործակցեն   էլեկտրոնային առողջապահության ոլորտում նորարար լուծումների նեդրման ոլորտում: Պայմանավորվածությունը ձեռք բերվեց Ֆրայբուրգի պետական բժշկական համալսարանի թիմի՝ «Էլեկտրոնային առողջապահության ազգային օպերատոր»  ընկերությունում  կայացած հանդիպմանը, որի ընթացքում ներկայացվեցին նաև ArMed eHealth հավելվածի նոր լուծումները:

Համագործակցության շնորհիվ հնարավոր կլինի  ArMed eHealth հավելվածի միջոցով  ռադիոլոգիական հետազոտության վերաբերյալ երկրորդ կարծիք ստանալ գերմանացի անվանի պրոֆեսոր, ռադիոլոգ Լորենց Յեգերի կողմից։

 «Բժշկական ծառայությունների պահանջարկը շարունակաբար աճում է,  ինչը հնարավոր է բավարարել միայն բժշկական գիտելիքները աշխարհով մեկ տարածելու միջոցով։ Ես անձամբ միշտ բաց եմ նոր գաղափարների համար եւ ընտրել եմ ArMed-ի հետ համագործակցությունը, քանի որ այն  մշակել է հիանալի, նորարարական պորտալ։ Այն հրաշալի հարթակ է այն բժիշկների համար, ովքեր ցանկանում են առաջարկել երկրորդ կարծիք, կապ հաստատել հիվանդների հետ և մատուցել այդ ծառայությունները»,- ասաց Լորենց  Յեգերը:

Այս հնարավորությունը թույլ է տալիս խուսափել  կրկնակի ռադիոլոգիական հետազոտություններից, և արդեն առկա հետազոտությունը ներկայացնելով՝ ստանալ  բժիշկ -մասնագետի երկրորդ կարծիք` ինչպես Հայաստանի, այնպես էլ արտերկրի բժիշկների կողմից:

«Ամեն ինչ արված է , որպեսզի  լավագույն  մասնագետների  կողմից, պացիենտի համար հարմար ճանապարհով, որակյալ բժշկական խորհրդատվություն ստանալու հասանելիություն տրամադրվի»,-նշեց  «Էլեկտրոնային առողջապահության ազգային օպերատոր»  ընկերության գործադիր տնօրեն Ավետ Մանուկյանը՝ ավելացնելով, որ  այս ծառայությունը  թվային համակարգը կատարելագործելու միայն առաջին քայլն է։ Առաջիկայում երկրորդ կարծիք ստանալու նպատակով նախատեսվում է ընդլայնել համագործակցությունն արտերկրի այլ ճանաչված կլինիկաների հետ։