Հայաստանում  էլեկտրոնային առողջապահության նոր լուծումներն ու հնարավորությունները ներկայացվել են Global Health 2025 ցուցահանդեսում, որն այս անգամ անցկացվել է Սաուդյան Արաբիայի մայրաքաղաք Էր Ռիադում: 

«Էլեկտրոնային առողջապահության ազգային օպերատոր» ընկերության տնօրեն Ավետ Մանուկյանը և ընկերության թիմն առանձին տաղավարով ներկայացրել են Հայաստանում  էլեկտրոնային առողջապահության  ոլորտում  ներդրված և ներդրվելիք նորարարական  լուծումները: Մասնավորապես ներկայացվել են հեռավար բժշկության  նոր ֆունկցիոնալ գործիքները՝  առցանց խորհրդատվության  տրամադրման, առցանց  երկրորդ կարծիք ստանալու  հնարավորությունները,  Dr Lex  կոչվող արհեստական  բանականության հատուկ  գործիքը, որն ախտորոշման գործընթացում հանդես է գալիս որպես բժշկի օգնական և աջակցում ավելի արագ ու  ճշգրիտ ախտորոշման կայացմանը:

Այս նորարարական լուծումները և, հատկապես, արհեստական բանականության  հատուկ գործիքը, որը մշակվել է հայ մասնագետների կողմից և արդեն ինտեգրված է ԱՐՄԵԴ համակարգում,  մեծ հետաքրքրություն է առաջացրել թե՛ խոշոր առողջապահական հաստատությունների, թե՛ տեխնոլոգիական ընկերությունների շրջանում:

Global Health -ը համարվում է  համաշխարհային առողջապահության ոլորտի կարևորագույն իրադարձություններից մեկը, որը համախմբում է ոլորտի պետական և մասնավոր հատվածների համաշխարհային առաջնորդների, աշխարհի տարբեր երկրներից առաջատար առողջապահական, տեխնոլոգիական ընկերությունների, գիտության ու  բիզնեսի ներկայացուցիչների: Այն յուրահատուկ  գլոբալ հարթակ է՝ քննարկելու ոչ միայն առողջապահության ոլորտի զարգացման միտումները, այլև գործնականում կիրառելու և ինտեգրելու  ընկերությունների կողմից ներկայացվող նորարարական  ու թվային լուծումները: